Lógir felagsins
Samtyktar á fyrsta sinnið á stovnandi aðalfundi felagsins 4. Apríl 2024, síðani broyttar 22. August 2024.
§ 1 Navn og heimstaður.
Navn felagsins er Hvítravnur Brasilskt Jiu-Jitsu, og heimstaður felagsins er Tórshavn.
Felagið kann brúka hesi sernøvn: Hvítravnur BJJ, White Raven BJJ.
§ 2 Endamál.
Endamál felagsins er fremja kunnleika og áhuga fyri Brasilskum Jiu-Jitsu, og geva øllum góðar karmar og møguleikan at mennast kropsliga, sinnaliga og sosialt gjøgnum stríðsítróttin.
§ 3 Limaskapur.
Ein og hvør kann gerast limur við at venda sær til annaðhvørt ein nevndarlim ella venjara. Ein samd nevnd kann nokta persóni limaskap. Verður persóni noktaður limaskapur, kann hann leggja spurningin fyri fyrstkomandi aðalfund til støðutakan.
Feløg og onnur áhugaði, kunnu gerast hvílandi limir.
Nevndin ásetur støddina á limagjaldinum fyri virknar-, hvílandi- og ungdómslimir. Limur kann siga limaskap sín upp við einum mánaða freist til ein 1. í einum mánaði. Nevndin kann koyra lim úr felagnum, um viðkomandi er í eftirstøðu við limagjaldi í meira enn 1 ár, hevur brotið viðtøkur felagsins ella á annan hátt grovt hevur forbrotið seg. Viðkomandi limur kann leggja spurningin fyri fyrstkomandi aðalfund til
støðutakan.
Felagið kann útnevna heiðurslimir.
§ 4 Aðalfundir.
Aðalfundurin, sum verður hildin í Tórshavnar Kommunu, er hægsti myndugleiki felagsins. Ársaðalfundur verður hildin áðrenn apríl mánaður er farin.
Nevndin kallar inn til aðalfundar skrivliga og/ella við uppslagi við í minsta lagi 14 daga varningi. Í innkallingini skal verða sagt frá fundarstaði, -tíð og -skrá.
Mál, sum limir vilja hava til viðgerðar, skulu vera nevndini í hendi í minsta lagi 12 dagar undan aðalfundinum. Í fundarboðunum verða innkomin mál stutt endurgivin, men skulu liggja frammi í fullum líki á skrivstovu felagsins í minsta lagi 8 dagar undan fundinum.
Á ársaðalfundinum er fundarskráin hendan:
* Val av fundarstjóra.
* Frágreiðing nevndarinnar fyri farna árið.
* Framløga av roknskapi og fíggjarstøðu til góðkenningar.
* Val av nevndarlimum og tiltakslimum.
* Val av grannskoðara.
* Innkomin mál.
* Ymiskt
Fundarstjórin ger av í øllum ivaspurningum á fundinum. Hann kann vera nevndarlimur. Atkvøðugreiðsla fer fram skrivliga, um ikki aðalfundurin góðkennir annan atkvøðuhátt. Atkvøðast kann sambært fulltrú. Fundarstjórin ger av gildi hennara.
Bert limir, sum hava fylt 14 ár og ikki eru í gjalds-eftirstøðu, hava atkvøðurætt. Valbærur er limur, sum er fyltur 18 ár.
Hvílandi limir hava møti- og talurætt, men tó ikki atkvøðurætt.
§ 5 Eykaaðalfundir.
Eykaaðalfundur verður hildin, tá ið nevndin heldur tað vera neyðugt ella tá ið 2/3 av limunum krevja tað. Mannagongdin á eykaaðalfundi er tann sama sum á ársaðalfundi.
§ 6 Nevndin
Felagið verður stýrt av eini 3- ella 5-manna nevnd. Hetta verður gjørt, so at tá áhugin er stórur, kunnu 5 veljast. Um áhugin at vera nevndarlimir minkar aftur, kunnu 3 nevndarlimir veljast. Nevndarlimir verða valdir fyri 2 ár í senn. Nevndin skipar seg sjálv við formanni/kvinnu, Kassameistara, sum virkar sum næstformaður/kvinna, skrivara og møguligum nevndarlimum.
2 tiltakslimir verða valdir fyri sama tíðarskeið. Nevndin heldur fund, so ofta hon heldur tað vera neyðugt. Nevndin er viðtøkufør, tá ið 3 nevndarlimir eru á fundi.
Nevndin kann gera reglugerð fyri virksemi sítt. Fer nevndarlimur frá í úrtíð, kemur fyrstvaldi tiltakslimur í hansara stað.
Gerðabók verður førd fyri allar aðal- og nevndarfundir.
§ 7 Tekningarreglur.
Felagið verður teknað av formanni, kassameistara og einum nevndarlimi, ella av samlaðu nevndini. Til keyp, sølu ella veðseting av føstum ognum krevst aðalfundarsamtykt.
§ 8 Heftilsi.
Felagið heftir bert fyri skyldum sínum við teimum til eina og hvørja tíð verandi ognum, sum hoyra felagnum til. Limirnir ella nevndin hefta ikki persónliga fyri felagsins skyldum, men bert við sínum limagjaldi.
§ 9 Roknskapur.
Roknskaparár felagsins er frá 1. januar og til 31. desembur. Fyrsta roknskaparár er frá stovnan felagsins og til 31. desembur.
Roknskapurin verður grannskoðaður av einum á aðalfundi valdum grannskoðara, sum hevur rætt at kanna felagsins bøkur og skjøl, tá ið hann ynskir tað.
§ 10 Viðtøkubroytingar.
At broyta viðtøkurnar krevst, at í minsta lagi 2/3 av møttu limunum atkvøða fyri.
§ 11 Avtøka.
At taka felagið av krevst, at í minsta lagi 2/3 av limum felagsins eru á fundi og samstundis eisini atkvøða fyri. Er ikki neyðugi meirilutin av limunum á fundi, kann nevndin kalla inn til eykaaðalfundar, har felagið kann verða tikið av, um 2/3 av givnum atkvøðum eru fyri, líkamikið hvussu nógvir limir eru møttir.
Verður felagið tikið av, velur aðalfundurin ein ella fleiri likvidatorar. Eitt møguligt avlop skal nýtast til eitthvørt ítróttarligt ella vælgerandi endamál.